நச்சுன்னு 4 கேள்வி



கம்யூனிஸ்ட்தி.மு.க. கூட்டு

கேள்வி 1: காங்கிரசுடன் தி.மு.க உறவு நீடித்தால் நாங்கள் தி.மு.க கூட்டணியிலிருந்து விலகிவிடுவோம் என்று தமிழகத்தில் இடதுசாரிகள் அறிவித்திருக்கிறார்களே?

தவறான அறிவிப்பு. காங்கிரசுடன் தி.மு.க உறவை முறித்துவிட்டால் மட்டும் ஆதரிப்பார்களா? மாநிலங்களவையில் கனிமொழியின் முதல் பேச்சே ஒப்பந்தத்தை ஓஹோ என்று ஆதரித்துப் பேசியதுதானே? அமெரிக்காவுடன் அணு சக்தி ஒப்பந்தம் செய்வதில் காங்கிரஸ் தீவிரம் காட்டியதை எதிர்த்து ஆதரவைத் திரும்பப் பெற்ற இடதுசாரிகள், அந்த ஒப்பந்தத்தையும் காங்கிரஸ் ஆட்சியையும் கவிழ விடாமல் காப்பாற்றிய கட்சிகளில் தி.மு.க.வும் ஒன்றல்லவா? எனவே அணு ஒப்பந்தத்தை ஆதரித்த, காங்கிரஸ் ஆட்சியை ஆதரித்த எந்தக் கட்சியுடனும் இடதுசாரிகள் சேரமாட்டோம் என்று அறிவிப்பதுதான் நேர்மை.

அதன்படி, தி.மு.க., பா.ம.க., ம.தி.மு.க., தே.மு.தி.க., விடுதலைச் சிறுத்தைகள் யாருடனும் இடதுசாரிகள் சேரமுடியாது.

பி.ஜே.பி.யும் அ.தி.மு.க.வும் ஒப்பந்தத்தை முழுமையாக எதிர்த்தவர்கள் அல்ல. தாங்கள் ஆட்சிக்கு வந்து அதை நிறைவேற்றவேண்டுமென்று விரும்புகிறவர்கள். எனவே அவர்களுடன் சேரக் கூடாது.

முதல்முறையாக இடதுசாரிகள் தமிழகமெங்கும் 40 எம்.பி தொகுதிகளிலும் 234 எம்.எல்.ஏ தொகுதிகளிலும் வேட்பாளர்களை நிறுத்தி, நிஜமான மூன்றாவது அணியாகத் தங்களை அடுத்த 20 வருடங்களில் வளர்த்துக் கொள்ளவும் விகிதாசாரப் பிரதிநிதித்துவ முறைக்காக முழுமூச்சாகப் போராடவும் நல்ல வாய்ப்பு இப்போதுதான் வந்திருக்கிறது. நிச்சயம் இதை அவர்கள் தவற....விடுவார்கள்!

மதவாத எதிர்ப்பு

கேள்வி 2: மதவாத பி.ஜே.பி. ஆட்சிக்கு வராமல் தடுக்க, மறுபடியும் பாபர் மசூதி இடிப்பு ஏற்படாமல் தடுக்க, தொடர்ந்து தங்கள் அணியில் இருக்கும்படி கம்யூனிஸ்ட்டுகளை கலைஞர் வேண்டிக் கொண்டிருக்கிறாரே?


மதவாத எதிர்ப்பு பற்றிப் பேசும் அருகதையற்றவர் கலைஞர் கருணாநிதி. பாபர் மசூதியை அத்வானி தலைமையில் ஒரு மத வெறிக் கூட்டம் போய் இடித்த சம்பவம் நடந்த பிறகுதான், பி.ஜே.பி.யுடன் தி.மு.க. கூட்டு வைத்துக் கொண்டது. குஜராத்தில் மோடி அரசின் ஆதரவுடன் நடந்த முஸ்லிம்கள் மீதான படுகொலைகள் பற்றி மழுப்பலாகக் கருத்து தெரிவித்தவர் கருணாநிதி.

கூட்டணி இருந்தாலும் இல்லாவிட்டாலும், ஆர்.எஸ்.எஸ்.காரர்களான வேதாந்தத்தையும் ஆர்.பி.வி.எஸ்.மணியனையும் அரசின் கிராமப் பூசாரிகள் நல வாரிய உறுப்பினர்களாகத் தொடர்ந்து நியமித்து வருவதும் கருணாநிதிதான். அதே ஆர்.பி.வி.எஸ்.மணியன் அண்மையில் குடந்தை ராமர் கோயிலில் `ஆன்மிக' சொற்பொழிவில், தசரதனைப் போல வயதானதும் ஓய்வெடுக்காமல் இருக்கும் அரசியல்வாதி என்று மறைமுகமாக கலைஞரைத் தாக்கிப் பேசினாலும், சுரணையில்லாமல் இருப்பவர் கருணாநிதி.

நான் சொன்னால் ஒரு லட்சம் ஓட்டுகள் கிடைக்கும் என்று நிச்சயமாகத் தெரிந்தால், `என் மனசாட்சியே ஞாநிதான்' என்று அறிவித்துவிடக் கூடியவர் அவர். மதவாத எதிர்ப்புப் பேச்சுகள், பகுத்தறிவுப்பேச்சுகள், `கடவுளை நான் ஏற்கிறேனா என்பது முக்கியமல்ல; அவர் என்னை ஏற்றுக் கொள்ளும் விதத்தில் நான் இருக்கிறேனா என்பதே முக்கியம்` என்பது போன்ற வழவழா பக்திப் பேச்சுகள், எல்லாமே அவருடைய சுயநல அரசியலின் முகமூடிகள்.


டி.எம்.எஸ். பாராட்டு விழா

கேள்வி3:டி.எம்.எஸ்.சுக்கு நடத்திய பாராட்டு விழா பாராட்டுக்குரியதுதானே?


டி.எம்.எஸ்.சுக்கு எங்கே பாராட்டு விழா நடந்தது? கருணாநிதியின் மகன் அழகிரியின் வலிமையைக் காட்டுவதற்காகவும், மதுரையில் கணிசமாக இருக்கும் டி.எம்.எஸ் பிறந்த ஜாதியினரின் ஓட்டுகளை அழகிரிக்கு சார்பாக இழுக்கவும் நடத்தப்பட்ட விழாதானே அது. தி.மு.க.வினரால் கொல்லப்பட்ட மார்க்சிஸ்ட் போராளி லீலாவதியும் டி.எம்.எஸ். ஜாதியில் பிறந்தவர்தான் என்பதை வசதியாக மறந்துவிட்டார்கள்.

காங்கிரஸ் கட்சிக்கு நிகரான கோஷ்டித் தகராறுகள் நிறைந்த கட்சி இன்று தி.மு.கழகம்தான். ஒரே வித்தியாசம் தி.மு.கவின் எல்லா கோஷ்டிகளும் ஒரே குடும்பத்துக்குள்ளேயே இருக்கின்றன. அந்த வாய்ப்பைக் கூட அவர்கள் கட்சியில் மற்றவர்களுக்குத் தருவதில்லை.

குடும்பத்துக்குள் இருக்கும் கோஷ்டிகள் எல்லாவற்றையும் சமாதானப்படுத்துவதுதான் கலைஞர் கருணாநிதியின் ஹோம் ஒர்க்காக இருக்கிறது. ஸ்டாலினுக்காக ஒரு இளைஞர் மாநாடு; கனிமொழிக்காக ஒரு மகளிர் மாநாடு நடத்தினால், அழகிரிக்காக ஒன்றை ஒப்புக் கொள்ளவேண்டியிருக்கிறது. இதிலே அழகிரி தன் மகள் கயல்விழியை முன்னிறுத்தினால், அடுத்து குடும்பத்தில் வெடிக்கக்கூடிய கோபங்களைச் சமாளிக்க, நவம்பர் 14 குழந்தைகள் தினத்தன்று கனிமொழி மகன் ஆதித்தன் தலைமையில் குழந்தைகள் மாநாடு நடத்தினாலும் வியப்படைய வேண்டாம்.

`நானும் ஒரு கம்யூனிஸ்ட்தான்' என்று வாடிக்கையாகப் பேசுவது போல `நானும் இன்னும் ஒரு குழந்தைதான்' என்று இலக்கிய நயத்துடன் ஒரு சொற்பொழிவையும் எதிர்பார்க்கலாம்.

டி.எம்.எஸ், இளையராஜா, ஏ.ஆர்.ரஹ்மான், சிவாஜி கணேசன் போன்ற திறமையாளர்கள் தமிழ்நாட்டின் பொதுச் சொத்து. கருணாநிதி, ஜெயலலிதா, ராமதாஸ், வைகோ, விஜய்காந்த் என்று எல்லா கட்சித்தலைவர்களும் ஒரே மேடையில் தோன்றி அவர்களைப் பாராட்டினால் மட்டுமே அது சரியான பாராட்டு.

ஒலிம்பிக் வெற்றி

கேள்வி 4: ஒலிம்பிக் வெற்றிக்காக ஒரு இந்தியனாக காலரைத் தூக்கிவிட்டுக் கொண்டீர்களா?


இல்லை. இந்த வெற்றி இந்தியாவுடைய வெற்றி இல்லை. இந்திய சமூகத்துடைய வெற்றியும் இல்லை.

இது அபிநவ் பிந்த்ரா என்ற தனியொரு பணக்கார இளைஞனின் வெற்றி. ஏழு வயதில் தன் வீட்டு வேலைக்காரி தலையில் பாட்டிலை வைத்து ஏர் கன்னால் சுட்டு வீழ்த்திய பணக்காரச் சிறுவன்தான் அபிநவ். தன் அம்மா தலையிலோ, அப்பா தலையிலோ, தங்கை தலையிலோ பாட்டிலை வைத்து சுட்டுப் பழகவில்லை.

துப்பாக்கி சுடுதல் பணக்காரர்களின் பொழுதுபோக்கு. அபிநவ் பயன்படுத்தும் துப்பாக்கியின் விலை சுமார் 30 ஆயிரம் ரூபாய்கள். லட்சக்கணக்கான ரூபாய் செலவில் மிக நவீனமான துப்பாக்கிகளுடன் அபிநவ் பயிற்சி செய்வதற்காக சொந்தத்தில் வைத்திருக்கும் பயிற்சிக்கூடம் ஏர் கண்டிஷன் செய்யப்பட்டது. அபிநவ்வின் அப்பா முழுக்க முழுக்க ஏற்றுமதிக்கென்றே உற்பத்தி செய்யும் உணவுத் தொழிற்சாலை நடத்துகிறார். `அபிநவ் இன்' என்ற பெயரில் 200 கோடி ரூபாய் ஓட்டலை டேராடூனில் கட்டி வருகிறார். அதை மகனுக்கு ஒலிம்பிக் சாதனைக்கான பரிசாக தரப் போகிறார்.

அரசு அளித்த பயிற்சியாளரும் பயிற்சியும் சுமார் என்று ஒதுக்கிவிட்டு தன் சொந்த செலவில் பயிற்சியெடுத்துக் கொண்டவர் அபிநவ். எத்தனை ஏழை, நடுத்தர வகுப்பு இந்திய இளைஞர்களுக்கு இது சாத்தியம் ?

இவை பற்றியெல்லாம் இந்திய சமூகத்துக்கு பெருமைப்பட என்ன இருக்கிறது? துப்பாக்கி சுடுவது முதலில் ஒரு விளையாட்டா என்பதே யோசிக்கப்பட வேண்டும்.

அபிநவ் என்ற தனி மனிதனின் உறுதி, உழைப்பு, முதுகெலும்பில் காயம் பட்டபோதும் விடாமுயற்சியுடன் பயிற்சி எடுத்தது போன்ற அம்சங்கள் மட்டுமே பாராட்டுக்கும் பின்பற்றுதலுக்கும் உரியவை. பி.டி.உஷா போன்ற கிராமத்து சாமான்ய மனிதர்கள் ஊக்குவிக்கப்பட்டு சாதனையாளர்களாக மாறும்போதுதான் இந்தியா பெருமைப்படலாம்..

குழந்தை யாருக்கு - வாசகர் கருத்து

குஜராத் கலவரத்தின் போது காணாமல் போய் இப்போது கிடைத்திருக்கும் குழந்தை யாருக்குச் சொந்தம்? ஆறு வருடமாக அதை வளர்த்த தாய்க்கா? ஆறு வருடமாக அதைத் தேடி வந்த, பெற்ற தாய்க்கா? உங்கள் கருத்துகளைக் கேட்டிருந்தேன்.

கருத்துகள் வந்து குவிந்திருக்கின்றன. பெற்ற தாயிடம் ஒப்படைக்கவேண்டுமென்று சொல்பவர்களும், வளர்ப்புத் தாயிடமே இருக்கவேண்டுமென்று சொல்பவர்களும் சம எண்ணிக்கையில் இருக்கிறார்கள்! இரு தரப்பினரும் தெரிவித்திருக்கும் காரணங்களில் பல நியாயமானவைதான். அதே சமயம், பெற்ற தாய் இஸ்லாமியராகவும் வளர்த்த தாய் ஹிந்துவாகவும் இருப்பதால், பலர் மதம் சார்ந்த அணுகுமுறையிலிருந்தே கருத்து தெரிவிக்கிறார்கள். விரல் விட்டு எண்ணக்கூடிய சில வாசகர்கள் மட்டுமே மாறுபட்ட தீர்வை முன்வைத்திருக்கிறார்கள். நீதிமன்றப் படிக்கட்டுகளில் ஏறி இறங்கி, சிறுவனுக்கு மன உளைச்சலை ஏற்படுத்தாமல், இரு தரப்பும் தமக்குள்ளேயே ஒரு தீர்வைக் கண்டறிய முயற்சிக்கவேண்டும் என்பதே அது. இரு குடும்பங்களும் அருகருகே குடியமர்ந்து ஒன்றாக சிறுவனை வளர்க்கட்டும் என்பதே அந்தத் தீர்வு.

அப்போது அவன் எந்த மதத்தைப் பின்பற்றுவான் என்பதே சிக்கல். நம் எல்லார் மீதுமே மதம் கட்டாயமாகத் திணிக்கப்பட்டிருக்கிறது என்பதுதான் உண்மை. விவேக் முஸாஃபரும் அதற்கு விதிவிலக்கல்ல. எட்டு வயதுக்குள் அவன் மீது இரு மதங்கள் திணிக்கப்பட்டுவிட்டன. இரு குடும்பங்களும் தமக்குள் பேசி சுமுகமான தீர்வுக்கு வருவதையே நான் ஆதரிக்கிறேன். சட்டத்தால் தீர்க்கமுடியாத சிக்கல் இது. வளர்ப்புத்தாய் மீனாவுக்கு, கணவரையும் இழந்து வாழும் சூழலில், மகனையும் பிரிவது துயரமானது. ஷேக்ஸெபுன்னிசா இணையருக்கோ இழந்த மகனை ஆறாண்டுகள் தேடி, கிட்டிய பின்னரும் பிரியவேண்டுமென்பது பெரும் கொடுமை. இரு தரப்பும் அருகருகே குடியமர்ந்து மகனை வளர்க்கலாம்.

இப்போதைக்கு இரு மதங்களின் பழக்கங்களையும் அவனுக்கு அறிமுகம் செய்வதில் தவறில்லை. எந்த மதத்தைப் பின்பற்றுவது என்பதை சிறுவன் பெரியவனான பிறகு முடிவு செய்யட்டும் என்று விட்டுவிடலாம். நாளை அவன் ஒரு நாத்திகனாகக் கூட மலரலாம். பொருளாதார வசதிகளைத் திரட்ட முடியுமானால், சிறுவனை, இப்போதே தொலைதூரத்தில் ஒரு நல்ல உறைவிடப் பள்ளிக்கு அனுப்பிவிடலாம். விடுமுறைக் காலங்களில் மட்டும் அவன் இரு குடும்பத்தினரையும் சந்திக்கலாம். குஜராத் சூழலில், விவேக் முஸாஃபர், விவேக்காக வளர்கிறானா, முசாஃபராக வளர்கிறானா என்பதை விட ஒரு நல்ல மனிதனாக வளர்கிறானா என்பதே முக்கியமானது. இன்றைய சூழலில் அதற்கு உதவக் கூடியது, கடைசி தீர்வு என்பதே என் கருத்து.

இந்த வாரப் பூச்செண்டு

மத்திய அமைச்சர் அன்புமணிக்கு. ஓரின உறவை கிரிமினல் குற்றம் என்று சொல்லும் இந்திய சட்டப்பிரிவை நீக்க வேண்டும் என்று பகிரங்கமாக அறிவித்திருப்பதற்காக இ.வா.பூ.

இந்த வாரக் குட்டு

திருப்பதி தேவஸ்தானத்துக்கு இந்த வாரக் குட்டு. வருடத்துக்கு ஆயிரம் கோடி ரூபாய் பட்ஜெட் போடும் இந்தக் கோயில், அரசுக்கு கட்ட வேண்டிய வரிகளைக் கட்டாமல் ஏய்த்துக் கொண்டிருக்கிறது. திருப்பதி நகராட்சிக்கு 5 கோடி வரி பாக்கி. திருப்பதி நகர மேம்பாட்டு கழகத்துக்கு 5 கோடி வரி பாக்கி. ஆந்திர அரசுக்கு 19 கோடி வரி பாக்கி. பக்தர்கள் கோடி கோடியாகக் கொட்டினாலும் அரசுக்கு வரி பாக்கி வைத்திருப்பதற்காக இ.வா.குட்டு.

இந்த வார ஓ போடு

சமூக ஆர்வலர் அ.கி.வேங்கட சுப்பிரமணியனின் புகாரையடுத்து, மாநில தலைமை தேர்தல் அதிகாரி நரேஷ் குப்தா, எல்லா மாவட்ட தேர்தல் அதிகாரிகளுக்கும் ஒரு கடிதம் அனுப்பியிருக்கிறார். யாருக்கும் ஓட்டு போட விரும்பாத வாக்காளர்கள் அதை 49 ஓ பிரிவின் கீழ் வாக்குச் சாவடியில் தெரிவித்து பதிவு செய்வதற்கு உள்ள உரிமையை ஒரு அறிவிப்பாக எல்லா வாக்குச்சாவடிகளிலும் பிரதானமாகத் தெரியும் விதத்தில் அமைக்க வேண்டும் என்று இதில் அறிவுறுத்தப்பட்டுள்ளது. நரேஷ் குப்தாவுக்கு ஓ போடுவோம். (மத்தவங்களுக்கு 49 ஓ)

0 மறுமொழிகள்:

Post a Comment

உங்களின் மறுமொழிகளை இடுங்கள் !